【個肚Keep住痛 訓又訓唔到 廣華生B一個人係產房感到好無助】

【個肚Keep住痛 訓又訓唔到 廣華生B一個人係產房感到好無助】

Bloggers 專欄
By 90後P牌媽咪 on 06 Mar 2018

今日已經係生完BB一個星期有多,對於生BB既過程仲係歷歷在目,感受好深刻!所以都要快d記錄底,第日等囡囡大個左都可以同佢分享返!

今次生BB由宮縮到穿羊水都有成3040個鐘,係221號晏5點個陣發現個肚隱隱作痛,一開始以為係平時既假宮縮,但發現佢係Keep住有規率性地痛,個刻即刻同老公備定案,但我無即刻入醫院,因為都只係15分鐘左右痛一次,所以我選擇留係屋企觀察多陣,我怕去到醫院會「被退貨」。去到夜晚都係訓得唔好,Keep住不停痛醒。去到22號朝早,仲要密到每5分鍾痛一次,即刻沖左個涼洗頭,仲去埋太興食左個早餐,就同老公搭的士去醫院。

28810113_870443039795411_790801531_o

去到廣華就去急症室辦入院手續,上左「候產房」觀察,姑娘會幫用部機觀察BB既心跳。去到醫院,個種痛就開始疏左,變到8-10分鐘痛一次。係候產科電話都無得玩,時間過得好慢好慢,但都可以出下去同老公傾下計,但個種係愈黎愈強烈,有少少似M痛、肚痛既感覺,每次維持40秒至1分鐘。個段期間,候產房既姑娘都好好陪下我傾計,但都話我未到最痛,要再痛d先得,個宮頸已經軟左。期間有醫生黎睇我既情況,係一個不知情既情況下,醫生伸左幾隻手指入陰道,但完全無講到會做咩,淨係話:有機會會見紅流血,唔洗驚。呢一點真係令我有少少唔開心,其實可以講一講,等我有少少心理準備⋯⋯

一直到夜晚都未去到5分鐘痛一次,佢地就轉左我上去產科個到等,話穿羊水或者痛到5分鐘一次先再轉返我落去,一轉左我上去3個鐘後,我就開始痛多左,去到凌晨2點痛到5分鐘一次,但同左姑娘講都無咩點理我,想訓訓唔到,訓著5分鐘就醒一次,個陣個感受好難受,個腦不停諗,早知揀開刀啦、好想有個人陪下自己,之後d眼淚不停咁流,已經唔係痛到喊,係個種孤單既感覺令我覺得好無助好寂寞。

去到23號凌晨5點真係頂唔順就禁鐘叫姑娘黎,姑娘幫我Check話已經開左3度,我個刻真係好開心,好怕痛左咁耐會係一度都無開。心入諗即刻多謝個囡囡既努力。轉返去「候產房」之後,一痛真係忍唔住係咁叫,但因為怕樣衰,只係好細聲咁叫。姑娘就話一痛就鼻吸口呼,唔好叫同忍,如果唔係個宮頸會軟得唔夠好。不過講就易做就難,我用左好大既理性控制自己,都唔係下下做到。去到7點,醫生黎幫我人工穿水,Feel到好多暖水流左出黎,個肚就愈黎愈痛,真係有一種想去便便既應覺,我既叫聲當然都愈黎愈黎勁,一痛我就好想去便便,姑娘又係話:唔準去便便啊,呼氣呼氣。

痛左一個鐘左右,係我好迷糊期間,聽到姑娘話:見到喇。就好快咁推左我去產房。一開始以為係拍戲個d手術室既樣,好暗有盞燈係頭頂,但原來係好光猛,仲要有「家的感覺」。入到去用左3下力,Feel到有d野出左黎,再聽到BB喊我先知「原來生左喇!!」。比想像中輕鬆,連醫生都話我好快,可惜老公趕唔切黎睇住我生,只係係縫線個陣入黎陪我(我覺得縫線仲痛過生)同BB做肌膚接觸先真係覺得自己真係要做媽媽喇!見到BB個刻,真係眼濕濕,好感恩佢錫住我,好快咁出左黎,仲要眼仔碌碌、玩下口水,真係好可愛!

28822470_870443006462081_665477514_o

到依家回望返,所謂既十級痛都無想像中咁痛,可能係因為母愛,只要BB順順利利、平平安安咁出世,已經足夠Cover返個種痛。順產並唔可怕,人生流流長,我只係用我成世人既小小時間去經歷呢一種痛,係一種好值得記念既痛。而且人一世物一世,應該咩都要試下,令我既生B過程好似完整左。

28755710_870443353128713_1946271387_o

其實回望返,我覺得自己生既過程同上奶時間都好快,可能同平時運動上、飲食上既習慣有關,下一次再同大家分享啦!

Text & Photos : 90後P牌媽媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

90後Fresh Grad媽媽,畢業不足半年做左媽媽,兒女係上天比我最大既祝福。充滿正能量既我,雖然年紀較細,人生經驗唔多,但懷孕過程中,令我對於育兒、教導亦有多左一番心得。希望藉住文章、Facebook Page帶到更多正面信息比一班同行者,同時記錄我懷孕過程同寶實既一點一滴。

Follow Instagram: mami.presslogic

Share to Facebook