【B鏈臨產媽慘痛18個鐘無人理 同護士理論激到穿羊水】

【B鏈臨產媽慘痛18個鐘無人理 同護士理論激到穿羊水】

Bloggers 專欄
By km媽媽 on 14 Mar 2018

(B型鏈球菌, 通常10個孕婦之中會有3-4個孕婦中左,係指係陰道入面有B型鏈球菌, 而孕婦本身沒病徵,怕生BB個陣會感染到BB,所以係生BB前 媽媽係要打抗生素避免感染到BB )

因為中左B鏈所以覆診個陣,醫生都有特別講到如果見紅,穿水,陣痛其中一樣都最好去醫院穩陣D,因為生BB前要提前打抗生素。
38週個陣,有日試過全日無咩動靜以為BB有咩事,即刻入院住左晚又宮探又檢查點知未生得出返黎,個陣好驚希望唔好咁快生 ,但到就黎40週個日都未有反應又驚點解BB仲未出黎。
101285830
原本係3月26出,到3.26全日無咩動靜,到夜晚十點幾終於有好少粉紅見紅同開始規律咁陣痛, 都照入院做好準備先,拎晒走佬袋準備充足咁去廣華急症室搞手續, 因為未生得所以去左待產房觀察。
有部機聽住BB心跳, 到第朝3.27醫生一早巡房, 醫生問你知唔知你過左預產期, 我話知道, 佢話你預點都生埋先走得, 佢幫我宮探伸左幾隻手指入觸道 佢話你雖然見紅有KEEP住陣痛但你子宮頸仲係好厚,我幫你整軟小小,會有機會有更多血但唔駛驚, 一直到夜晚都係KEEP 住間唔中M痛下同埋去廁所係多血左。
到3.28一早5點幾我係痛醒左 , 痛到個子宮刀切咁, 突然話黎就黎,痛到我係床到郁黎郁去,即刻覺得唔多對路,拎個電話出黎計陣痛,已經10鐘開始痛一次,咁個醫生黎檢查宮探話,我痛到咁但其實一度都未開,話我子宮頸個位比正常人厚,所以幫我處理一下,有助快D訓, 但之後痛到行路去廁所都好困難,第一次行兩步都用左兩個字,痛到完全無胃口食野,淨係係張床郁黎郁去。
到下午一直都係咁痛,食野又食唔到,嘔左3次連黃膽水都嘔埋出黎。有個女醫生見我咁辛苦,話同左醫生講幫我催生打止痛針無咁辛苦,等陣會推我入候產室,我痛到連老公屋企人黎探我都唔理,係咁係張床到郁黎郁去,同埋因爲BB壓住左條腰骨所以前痛後痛,痛足全日到夜晚8點個陣,個姑娘就推床幫我轉過去候產房,一黎到個老護士已經即刻話:「拿,你自己話調黎但你未生得嫁。」我話:「下?係醫生調我黎話幫我催生打止痛針。」佢話:「無咁既事」。
172521629
我仍然都係痛到郁黎郁去係咁嗌痛,因為我係咁郁個部機顯示我0讀數,個老護又話我未有耐生得叫我UN下波波(健康球)先,但明明個醫生話調我黎催生打止痛針,過到黎無理由因爲我係咁郁0讀數就話未生得,我個陣已經痛到落唔到床,坐左係地下,行唔到去廁所,個清潔姐姐一見我坐左係地下,衝過黎扶起我話唔好坐地下啦,吸地氣,問我咩事,我已經痛到喊住話想去廁所,跟住個清潔姐姐就拎左個便攜廁所板放係床到比我去,我一去完一抺全部都係血,更加唔開心,見紅陣痛,痛到好辛苦,全日又無食野又壓住條腰骨(因為本身我腰骨唔好),個陣,陣痛已經去到三分鐘一次,我就同老護士理論,我話明明調我過黎話打止痛針催生,而家因為部機話0就咩都唔做,佢話見我咁辛苦可以打電話比老公叫佢過黎幫我按摩下,嘈左一輪之後,佢就話每人只有兩支止痛針,我話唔理要打支先,真係好痛。
跟住就打左支止痛針,個陣夜晚十點,我繼續同老護士理論話:「明明醫生話幫我催生,點知你話部機0讀數所以唔催。」講講下激動得滯,感覺到下面流野出黎,我即刻話:「比你激到流血啦。」點知原來係大量出羊水,護士即刻圍埋黎,有個護士話我中左B鍊正常要提早種豆,打抗生素,點知突然咁快生得,就要即刻左右手都幫我種豆,打兩支抗生素 ,另一個姑娘問係咪老公黎陪產(因為個陣揀左陪產)。
IMG_1490
我話係即刻打比老公(佢行緊黎本身話幫我按摩),我話我好似生得穿左羊水快D黎,一穿羊水感覺就唔同左,變左好想屙屎,咁我就話好想屙,個護士就話你屙啦,我大力一屙,佢地即刻叫停,話見到BB頭髮啦!你係咪等你老公黎先生 ?我話係,跟住佢地準備推床,我話去邊呀?佢地話產房呀!直接產房等你老公啦!到我老公一黎到,即刻坐我隔離,捉住我隻手同我加油,我大力咁屙左4次,15分鐘就生左,一生個下聽到MAX哥雄大既喊聲,見到護士抱住佢個下,即刻感動到流左少少眼淚,因為全日無食過野,又痛左咁耐,又大力生仔,一生完個下好攰,問護士走得未,佢話未因為要縫返個傷口,原來佢剪左,其實生仔個下唔痛,縫傷口個下先痛。
IMG_1375
終於縫完,我問佢走得未,佢話未,原來仲要親子時間,我除晒D衫鈕畀BB貼住,等佢訓係心口,到之後去返產後房已經係3.29凌晨,跟住就全程餵人奶同一直望住呀仔,眼神完全離唔開覺得好奇妙。
呢個生仔經歷真係難忘!

Text & Photos : km媽媽
【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

我係一位90後媽媽,2017 年3 月生左第一胎max哥(因為佢老積又大份) 主要分享日常生活點滴/仔仔既成長過程/ 旅行住宿飲食分享/ 帶b去旅行/ 有時會有品牌邀請合作等等~ Facebook Page:90後店主km媽媽

Follow Instagram: mami.presslogic

Share to Facebook