【英國移民政策愈來愈嚴 為下一代多條出路決係英國生B 但原來幫BB拎居英權一啲都唔簡單】

【英國移民政策愈來愈嚴 為下一代多條出路決係英國生B 但原來幫BB拎居英權一啲都唔簡單】

Bloggers 專欄 · 媽媽日常須知
By 英孩・三點三 on 08 Aug 2018

你去英國衝閘生仔?點解得既?我揸BNO又去生得唔得?

shutterstock_372644803

當我同我身邊既人講我去英國生BB,個個都黑人問號樣。呢個時勢,有邊個唔想下一代有外國國籍,俾多條路個細行下丫。衰衰地諗,有咩事第時去英國讀大學有得平學費都好丫。所以我同偽英爸只係用左一個星期既時間就決定黎英國生BB,好好彩我地兩邊家人都好支持今次既決定。

shutterstock_166699052

解決返大家個黑人問號先。我之所以可以去英國生BB既原因係受益於當年港英時代所推行既居英權計劃。當時英國俾英屬香港指定合資格人士英國居留權,一共提供50,000個名額。而我因為當時做公務員既爸爸既先見知明,所以有幸靠父幹成為居英權二代,得到寫上British Citizen既英國護照。

shutterstock_607235345

但點解我要親自去英國生,攞住BC既我係香港生下一代唔係就可以自動有英籍?原來英國政府將BC分為by descent同otherwise-than-by-descent兩種。我爸爸屬於otherwise-than-by-descent即非憑世系取得英籍,而我屬於by descent即憑世襲取得英籍。兩者最大既分別就係otherwise-than-by-descent可以將英籍直接傳到下一代而by descent就要一定要係英國生先可以直接取得英籍。一係你願意用返正常途徑幫BB申請settlement visa同幫老公申請埋Spouse Visa, 即要全家起碼要係英國定居5年先有機會申請BC。仲要做埋life in uk test,英文測試等等。千其唔好以為做「太空人」就搞得掂,依家英國移民政策嚴左好多,而且移民條例年年都修改。所以權衡輕重之下,我就由準港媽搖身一變做偽英媽。

上網有關居英權二代去英國生仔資訊真係唔多,距離預產期仲有一個月,好多未知既挑戰等緊我,Wish me luck!

==============================

Text & Photos:英孩·三點三

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

個人簡介: 從未踏足過英國既準港媽膽粗粗32週出走英國生英孩,搖身一變做偽英媽。FB: @ukbaby3.3

Follow Instagram: mami.presslogic

Share to Facebook