無請陪月姐姐幫手 新手媽媽坐月進補攻略

無請陪月姐姐幫手 新手媽媽坐月進補攻略

Uncategorized · 媽媽心事
By PressLogic on 15 Aug 2018

老人家成日都話:「坐月坐得好,身體好過做女果陣呀!」可想而知,坐月對一個產婦黎講係幾咁重要,而家唔少媽媽喺生完BB之後都會請陪月姐姐幫手,一黎可以幫自己進補,二黎可以幫手照顧BB,等自己嘅身體可以恢復得快啲!不過,並唔係所有家庭都有能力可以請得起陪月姐姐,所以好多新手媽媽都會請媽咪或奶奶幫手坐月,有啲媽媽甚至唔想麻煩人,一於全部都自己搞掂!不過,坐月都有進補嘅先後次序,如果亂食補品嘅話,分分鐘會弄巧反拙,最嚴重嘅仲會引起產後血崩,所以各位媽媽要認清進補嘅先後次序,幫自己坐好月,做個面色紅潤嘅靚媽媽~

shutterstock_385304878

第一階段:休養期《平補、排惡露》適合產後頭五天

岩岩生完嘅媽媽體質較虛弱,腸胃亦需要休息,呢段時期嘅飲食最好以清淡為主,平補調理,所以暫時唔可以進補。好多老一輩嘅會叫媽媽食薑黎驅除子宮嘅風,不過醫生會強調媽媽喺產後千祈唔好太早食薑住,因為薑屬於行氣活血嘅食材,會令尚未復原嘅止宮繼續出血,惡露不止,所以最好過咗12朝先食。

shutterstock_588424187

呢段時期嘅媽媽可以食紅糖粥、桂圓粥或五更飯;湯品可以係清燉桂圓烏雞、桂圓蓮子木耳湯或木瓜花生湯;餸方面可以食南瓜炒肉絲、 梅菜清蒸鱸魚、蓮藕花生炆雞柳等;菜類亦可以選擇菠菜、西蘭花、椰菜花、蜜豆、紅莧菜、四季豆、青紅甜椒、粟米、節瓜、薯仔、紅蘿蔔、蕃茄或南瓜等;甜品可以食紅糖蓮子百合糖水 、紅糖桂圓紅豆沙或雪耳燉木瓜。

shutterstock_1055615411

第二階段:休養期《平補、去瘀血、防風寒》適合產後第六天至十天

呢個時候嘅媽媽腸胃將會慢慢恢復,但餸菜仍然建議以清淡為主,只能清補,尚未能大補。呢段休養期主力係去清瘀血,強身抗風寒。

媽媽仍可以食紅糖粥、桂圓粥或五更飯,更可食花膠紅米粥 (人奶媽媽注意:花膠有機會引致塞奶,因此不能多食);湯品可以係淮山杞子桂圓燉花膠、 蓮子合桃煲瘦肉 或南棗桂圓燉烏雞;餸方面可以食金針黑木耳蒸桂花魚、 栗子紅腰豆炆蓮藕、冬菇瑤柱蒸雞等;菜類與第一階段相同;甜品可以食芝麻糊 、花生紅棗糖水或杞子桂圓紅糖煲鵪鶉蛋。

shutterstock_321185447

第三階段:進補期《溫補、補血潤腸胃》適合產後第十一天至十五天

媽媽可以開始用白糖、冰糖來代替紅糖,呢段進補期可以開始溫補,幫助消化同排便機能嘅恢復,但不宜太燥。

早餐可以係桂圓蓮子粥、五更飯或花膠紅米粥;湯品方面係黑豆合桃煲瘦肉、 蓮藕章魚紅豆湯或 黨參桂圓燉豬展;餸類可選擇金針雲耳蒸雞、陳皮紅豆炆鯇魚或桂圓肉煎蛋;如惡露已停,可食麻油薑茸炒飯、雞酒或薑醋;菜類與第一階段相同;甜品可以食薑汁芝麻花生湯丸、杞子紅棗煲雞蛋或淮山雪耳糖水。而媽媽亦可以開始食水果,如木瓜、提子、龍眼、西梅或桃類。

shutterstock_582315883

第四階段:進補期《溫補、壯腰補腎》適合產後第十六天至二十天

呢段進補期以溫補為主,主力補媽媽嘅腦同強化腰腎。

早餐可以食南瓜肉絲通粉、花膠紅米粥或瑤柱花生魚片粥;湯品方面係紅棗桂圓蓮藕湯、木耳豬潤紅棗湯或蓮子百合南棗煲豬展;餸類可以食花生炆豬手、栗子紅腰豆炆雞柳、雞酒、豬腳薑;飯同菜類可跟第三階段;甜品可食合桃芝麻糊、杞子紅棗煲雞蛋或薑汁桂圓蕃薯糖水。

shutterstock_278532890

第五階段:大補期《養血、大補元氣》適合產後第二十一天至三十天

媽媽可以喺呢段大補期開始大補強身、行補氣血。

早餐可食薑片南瓜粥、冬菇紅棗魚片粥、紅棗桂圓雞粥、花生紅棗肉粥或蠔鼓豬潤粥;湯品方面係黨參紅棗桂圓燉雞、菠菜豬潤湯、 猴頭菇花膠煲豬展、杞子椰肉燉雞或淮山杞子紅棗燉烏雞;餸類可食淮山猴頭菇炆豬展、黨參紅棗杞子蒸桂花魚、冬菇栗子炆雞柳、百合牛肉炒蜜豆、豬腳薑;飯類同菜類可跟第三階段;甜品可食薑汁花生湯丸、陳皮桂圓栗子糖水、蓮子百合紅豆沙、杞子紅棗桂圓煲鵪鶉蛋;水果選擇方面可加入荔枝和榴槤。

shutterstock_19166587

第六階段:滋補期《養血補氣》適合產後第三十一天至三十五天

經過大補期的行補氣血後,呢段滋補期嘅作用就係養血補氣。

早餐可食桂圓蓮子粥、南瓜粥、瑤柱花膠粥;湯品方面係黨參紅棗桂圓燉烏雞、淮山杞子椰肉燉花膠、木瓜花生魚尾湯;餸類可食冬菇肉絲蒸鱸魚、金針雲耳蒸雞、百合牛肉炒蜜豆;飯類同菜類可跟第三階段;甜品可食南北杏冰糖雪耳燉木瓜、薑汁芝麻花生湯丸、冰糖沙參玉竹煲鵪鶉蛋;水果可加入哈蜜瓜和車厘子。

shutterstock_714162220

第七階段:滋補期《益脾、滋陰潤肺》適合產後第三十六天至四十天

媽媽養好血之後,呢段滋補期嘅作用就係滋陰潤肺。

早餐可以食三文治、麵包、麥皮、粟米片等;湯品方面係沙參玉竹燉烏雞、淮山杞子椰肉燉花膠、木瓜紅棗鯇魚尾湯;餸類可食桂圓肉煎蛋、鮮茄南瓜燴豬扒、香菇青椒雞粒扒豆腐;飯類可食薑醋飯或白飯;甜品可食南北杏冰糖雪耳燉木瓜、蜜棗桂圓燉木瓜或沙參蜜棗煲雞蛋。

shutterstock_351853334

Text: Mami Editorial

Follow Instagram: mami.presslogic

Share to Facebook