【BB加固喇!應揀傳統加固定BLW好?到底邊種啱自己?】

【BB加固喇!應揀傳統加固定BLW好?到底邊種啱自己?】

Bloggers 專欄 · 家家有廚娘 · 親子相處
By 僑蛋媽 on 07 Sep 2018

早係僑蛋出世前我已經搜集左好多關於加固既資料。身邊好多朋友問我到底應該要揀邊一種。

我覺得其他唔理邊一種都好,最緊要係睇下岩唔岩自己,無錯,係岩唔岩媽咪你自己。

首先講左最簡單既傳統加固先,其實就即係將全部野,變哂做糊狀,糊仔,米糊,粥仔,果蓉等等。

shutterstock_743111095

好處:傳統加固壓力比較小,家人可以幫忙,比較乾淨快捷。

缺點:需要家長喂食,家長需喂食完才能自己吃飯。

BLW原理簡單,但就經常比人誤解,相信有唔少人都係睇左「B來了!」先知道有BLW呢回事,但仍然係好多誤解,好多人以為BLW即是將食物切成手指狀,錯!呢個其實只係第一步,BLW全名「baby Led Weaning」中文「嬰兒主導式進食」。

BLW其實唔單止係講緊手指食物,就算你比糊仔佢佢識得自己用手食,用匙食,佢都叫BLW。

shutterstock_627989756

重點在於「自主進食」即唔餵佢,唔幫佢拎上手,唔干涉佢食幾多。

而大家所知既手指食物只係因為方便BB拎住同埋岩岩開始時未太識咀嚼容易哽親。而我地盡量都會保留食物既原型同質感,咁其實都有利BB既發展咖!

而好多人都以為出左牙先BLW到,但其實BB本身已經有牙咖啦!只係係牙床到未升上黎,而用牙齦其實已經可以咬到㗎喇!

shutterstock_402197314

好處:學習咀嚼,訓練手部大小肌肉,可以同枱進食,減少偏食機會,探索食物等

壞處:會食到周圍都係,壓力大,會受到奇異既目光。

好多人都會以為BLW比傳統加固容易哽親,但其實傳統加固都會哽親,我建議其實咩加固都好都要先學好急救,就算加固無哽親你都難保會唔會手多多既BB塞左啲硬物入口哽親,所以我認為學急救係好必須,急救可以係紅十字會又或者聖約翰到學到,大家自己有興趣再搜尋。

其實BLW既好處比傳統加固既多,但係大家係BLW前必須要考慮係咪真係適合自己,BLW絕對會整到成地成面成頭都係,如果有潔癖鐘意食一啖抹一下既真係隨時一餐一包濕紙巾,最大既困難係到底身邊既人支唔支持。我大概因爲BLW同長輩發生衝突大概10萬次,老一輩未聽過BLW可能會好多說話比你聽,所以家人支唔支持其實好重要,由其係在職媽咪。

shutterstock_1164991549

到你帶B去餐廳食,亦會不停受到白眼,經常有路人善意提醒我唔可咁樣比佢地食!又會擔心BB食唔食得飽,其實心理因素都好重要!湊仔生活唔簡單,無必要搞到壓力咁大。但好似我咁,污糟當messy play,輕鬆食既就覺得BLW好好,好方便。

介紹三個我經常瀏覽既專頁比大家,係裡有好多食譜同加固歷程分享,對我既幫助亦十分大,再一次多謝各位媽咪無私既分享

BLW香港爸爸媽媽區 (專頁有個頂置文章,好重要,想BLW必睇)

BLW初哥區(baby-led weaning 及可供小朋友自食的食譜區)

添加固體食物分享及交流區 (各種粥仔,糊仔,BLW食譜都有)

==============================

Text & Photos : 僑蛋媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

90後全職媽咪,女兒僑蛋於2017年7月出生,全人奶,讚好FB:僑蛋.搗蛋

Follow Instagram: mami.presslogic

Share to Facebook