令媽媽好無言 3個老公唔幫手做家務嘅藉口

令媽媽好無言 3個老公唔幫手做家務嘅藉口

Uncategorized
By PressLogic on 24 Sep 2018

BB出世後,好多爸爸媽媽就算幾深愛對方,難免都會為家務分工不均而鬧不快。即使媽媽係全職定係在職都好,往往都會係被分配更多家務嘅一方,有時想同老公商議重新分配家務,請老公都幫手做下家務,都可能會被老公用以下3個理由拒絕,令媽媽覺得錯愕同委屈。

shutterstock_200103434

1.我唔識做

或者爸爸認為自己唔擅長做家務,怕做錯被媽媽恥笑或責怪,為咗避免挫敗感而唔做家務。但事實上冇人天生就識做家務,媽媽未嫁之前都可能係十指不沾陽春水,不過係為咗照顧好家庭而努力去學做家務。當BB出世後,媽媽為咗將BB照顧好,凡事亦會親力親為。但隨著BB愈嚟愈大,媽媽喺照顧BB上,需要嘅精力同耐力就愈多,非常需要多一個人幫手!但當聽到爸爸一句唔識做而拒絕為家庭付出,真係會令媽媽感到好心淡!

shutterstock_678370759

2.我開咗成日工好攰

返工會有收工同放假嘅時候,但媽媽嘅工作係24小時全年無休,加上各種家務都需要體力勞動,試問邊個份工攰啲?如果係在職媽媽嘅話,亦一樣返足全日工,放工後接手處理各種家務,唔通媽媽唔會攰?請用呢個理由推搪做家務嘅爸爸將心比己一下,媽媽都甘願為家庭而日夜操勞,作為家庭嘅支柱之一,又點可以唔幫手呢?

shutterstock_582234067

3.以前我媽都係咁做

可能喺爸爸嘅成長家庭中,係父親外出工作,母親做全職家庭主婦湊大,所以從小已被灌輸家務係由女人做、老婆要服侍老公、孩子嘅觀念。但湊小朋友畢竟係一份好累人嘅工作,全職媽媽除咗夜晚瞓覺都係工作中;加上現今好多家庭都係雙職父母,媽媽放工後仍要湊小朋友,變相一日打兩份工!作為另一半應體貼老婆嘅辛勞,適時幫忙,而唔好視之為必然!請唔好用愛之名去剝削老婆,要記住老婆係嫁畀你,而唔係賣身做妹仔。

shutterstock_1104757172 (1)

Text: Mami Editorial

Follow Instagram: mami.presslogic

Share to Facebook