【新手媽媽生完BB咩都唔識 回顧瑪嘉烈生b後住院記】

【新手媽媽生完BB咩都唔識 回顧瑪嘉烈生b後住院記】

Bloggers 專欄 · 媽媽心事
By 綿綿媽媽 on 10 Oct 2018

因為太多事情想記錄,所以要分開幾篇寫,想睇之前瑪嘉烈半全餐生b過程,可以到【回顧瑪嘉烈生B過程 順產變開刀】


4月28日
上文提過綿綿出世時有小小發燒及白血球較高,要留在家護病房觀察,而探訪人一定要係bb 既爸爸媽媽,原來其他人都唔可以探,幸好探訪時間是9am至9pm, 都算長時間。 由於手術後第一日,我未落得床, 暫時未能探綿綿, 所以只能叫綿綿爸爸幫手拎齊尿片用品到家護病房及睇綿綿bb 。

唔知呢日醫院係咪好多bb出世,所以醫院姑娘好忙, 本身話會教我擠黃金初乳比綿綿飲,但最後我等了全日,到晚上10:30pm, 自已主動再問,先有姑娘拎針筒教我,但覺得有d迷茫,最後擠左好小,得0.5ml, 問其中一個當值姐姐,叫佢拎比bb, 佢話太小, 多d先拎比bb, 到休息好之後再試, 可能手勢唔岩啦,又或者未上晒奶,只得1.5ml, 之後問姑娘可否給比bb食住先,但當時已經零晨3:00, 人奶係室溫已超過3小時, 已經唔飲得,所以姑娘最後幫我掉左,叫我再擠過,所以黃金初乳無得比綿綿飲了。 因為第一日一直未落得床, 所以姑娘只能餵奶粉比綿綿食。

4月29日
到第二日我擠到1.5ml, 雖然唔多,但我可以落床,所以直接拎去比姑娘餵綿綿,我主動問姑娘可否教我埋身,約左2個時間,話可以教我, 結果每次過去, 姑娘都好忙,只留底我和綿綿係房自已試, 仲話試完再出去補奶粉,無真正教我,結果未能成功埋身餵,一埋身綿綿就喊得好勁,無從入手,感到有d無助及失望, 無辦法之下結果都要抱番綿綿出去飲奶粉。記得呢日同綿綿爸爸一齊睇綿綿, 估唔到爸爸第一次餵奶,第一次掃風, 手勢咁好,而我第一次換片, 抹屎動作太慢,手忙腳亂呀,仲搞到綿綿向爸爸斟茶,真係要努力學習湊b先得!



4月30日

呢日綿綿報告出左, 一切正常,終於可以夜晚7點後過來我身邊喇, 第一晚嘗試照顧綿綿,原來真係唔容易。 醫院姑娘就會叫你先換片,跟住餵奶,掃風,之後bb 瞓覺。通常每3小時餵一次奶,首先講下餵人奶,可能我腹部傷口痛既關係, 好難將bb埋身,我同綿綿好似完全夾唔到, 埋身放唔岩位置,飲唔到就狂喊,見到好心痛。但每位姑娘都有不同意見, 一個就唔肯比奶粉,要我試到得為止, 但我試左好耐,都唔係好成功,綿綿又好肚餓又大喊,個心勁痛,所以綿綿餓左一陣,我就問另一位姑娘拎奶粉,到下一餐,有姑娘叫我擠定人奶, 跟住補奶粉,但我預備擠時,又有姑娘叫我唔好擠, 等bb埋身, 令到我真係好亂,最後第二餐係比奶粉綿綿飲。 到幫bb掃風,有時掃左好耐都未得,又見到bb綿綿嘔奶,所以好驚,放佢係床仔佢又喊,又要望實佢, 驚佢嘔奶,所以大部分時都抱住佢,自已唔敢瞓。到第三餐我再問另一位當值護士,有什麼方法,最後決定先濟定奶,如果埋唔到身都有小小人奶飲,跟住再補奶粉。 開頭姑娘比左2支針筒,但我發覺成日漏出來,再問姑娘,原來擠出來多乳汁,針筒好難儲起晒,會浪費,於是比左奶樽我,用手慢慢擠, 擠奶原來真係唔容易, 我擠左1小時, 只有10ml, 但已經有小小進步,最後護士幫我直接餵比綿綿,完全唔會浪費。當時個刻好感動,好感激唯一呢位護士,綿綿終於成功飲到媽媽10ml人奶, 當然之後都要補返50ml奶粉啦。講到換片, 此終係新手,真係手忙腳亂,呢晚換左頭1次片都叫順利,但第2次d便便原來過晒底, 衫及bb床仔都有,結果我要將床單, 衫仔,包被所有野換過晒, 當時好亂,又要幫綿綿抹patpat, 又要快d換好床單著好衫,怕佢冷親,又怕d便便整到佢,總之好混亂。 呢晚發生所有細節其實好驚,可能我太緊張,又怕佢嘔奶,所以成日抱住佢,傷口又痛,又要擠奶,但又擔心綿綿, 怕照顧得唔好,成日驚整親bb, 最後等到第2朝都未瞓過。

5月1日

我食完早餐後,等到醫生來巡房, check完傷口,醫生就批左我下午1點後可以出院,跟住要去聽有關出院講座, 變左留低綿綿放係床仔一段時間,我個心勁膽心,但又唔可以唔去,因為成晚無瞓,聽講座時我瞓著左,完全唔知佢講乜? 但有派小冊子,都係健康院既資料, 唯有之後補睇番,完了講座,我9秒9 返去睇綿綿,好怕佢嘔奶及喊,因為我成日怕bb瞓底嘔奶會好容易窒息, 真係好膽心,唔知其他媽媽會唔會好似我咁神經質呢?但呢日係醫院,我真係控制唔到自已既不安。 之後等姑娘幫我洗傷口,抽埋血就可以通知屋企人來接我和綿綿出院。 出院前護士幫綿綿打卡介苗針,綿綿好勁,叫左一聲就無事,又無喊, 勁過媽媽呀, 因為媽媽好怕打針架!終於等到食完午餐,護士講解晒出院後既安排,包括bb健康院檢查及我傷口護理等等事情。 屋企人就可以來接我地出完喇。 「綿綿~我地會直接去你婆婆東涌家坐月,媽媽同你都要努力呀!」

*一路寫呢篇記錄,一路諗番起當時係醫院時同綿綿第一晚相處既日子,覺得好感觸好難忘,到現在我仍然覺得自已好似發夢,我真的生了綿綿,我真的做媽媽了,現在有時望住綿綿,感覺好神奇,本身係肚入面,睇返d相,覺得你好似大得好快,唔知係咪太迷戀自已囝囝,我連瞓著覺,有時都會發夢見到綿綿。 因為太多事情想同大家分享及給自已小小記錄,我會再寫出院後既經歷,包括產後傷口及餵奶問題,有興趣可以繼續留意我既blog!

==============================

Text & Photos : 綿綿媽媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

我叫Suki, 是一位化妝師及花藝師,現在懷有綿綿bb, 懷孕真的很奇妙, 事業心重既我, 居然希望將來做全職媽媽, 多年前常在網絡分享貓咪(薯條仔)生活點滴,扮靚化妝心得, 後來工作太忙甚少分享了。 可能到了人生另一階段, 就激發我重新再想寫blog既衝動,更加希望將所有懷孕歷程到出世後既生活趣事,記錄及同大家分享,綿綿~ 爸爸媽媽好期待你既來臨呵

Follow Instagram: mami.presslogic

Share to Facebook