美國出生8天女嬰感染疱疹 媽媽痛心發文籲停止親吻小寶寶

美國出生8天女嬰感染疱疹 媽媽痛心發文籲停止親吻小寶寶

媽媽日常須知
By PressLogic on 30 Oct 2018

美國有一名出世僅8天嘅女BB,因為感染單純疱疹病毒一型死亡。媽媽Abigail喺社交網站忍痛呼籲大家關注感染疱疹嘅嚴重性。

1a

媽媽Abigail喺社交網站指,BB囡Aliza出世無耐,一班親朋戚友嚟探媽媽同BB,懷疑其間有人因為唔知自己係帶菌者,但錫咗或者未洗手就掂Aliza,所以導致Aliza感染。

Aliza只享受過1日半嘅健康生活,Abigail指囡囡接觸朋友們36小時後,就開始出現體力下降、胃口變差同血糖降低嘅病徵。第二日就完全病咗,需要入院檢查,但3日後醫生先診斷BB Aliza感染疱疹病毒,當時病毒已經擴散至Aliza嘅肺部及大腦。媽媽Abigail痛心憶述,個陣已經見到囡囡個腦腫脹,血管都明顯突出。

2

其後Aliza都需要靠儀器協助呼吸,Abigail都傷心話,佢難以相信一個咁細嘅BB身上會插滿咁多喉管。

Aliza最終被證實腦部死亡,Abigail同老公亦唱住「You are my sunshine」陪囡囡過最後階段。

1

Abigail經歷半年後先走出傷痛,佢明白好多朋友都好痛錫BB,但係大家唔清楚,一個啱啱出世嘅BB身體有幾脆弱,希望透過囡囡慘痛經歷,提醒所有人,停止親吻BB,再唔想有BB承受依種痛苦,避免悲劇發生。

單純疱疹病毒一型,即坊間成日講嘅「口唇疱疹」,又稱「唇瘡」。感染疱疹病毒初期,並唔會有明顯病徵,係常見嘅傳染疾病,對於6個月以下或發育中嘅小朋友特別危險,病毒容易擴散至BB其他器官,接近三分之一嘅BB即使接受治療都會死亡。

世界衞生組織及醫學界指出,雖然感染單純疱疹病毒後無明顯嘅病徵,但潛伏期仍可以傳播病毒,尤其透過口水或身上嘅水泡傳播。

Text: Mami Editorial

Photos:Abigail [email protected]

Follow Instagram: mami.presslogic

Share to Facebook