全職媽媽嘅悲哀你又知唔知? 大家唔洗太羨慕

全職媽媽嘅悲哀你又知唔知? 大家唔洗太羨慕

媽媽心事
By PressLogic on 13 Nov 2018

做人媽媽難,做全職媽媽更艱難。喺依個年代同社會,如果聽到你係一位全職媽媽,大家都會心心眼,覺得你肯定幸福美滿,無憂無愁只湊仔。無錯,可以凡事親力親為照顧自己小朋友同家人係一件幸福嘅事,但係,你地又知道全職媽媽嘅悲哀嗎?

shutterstock_794196004

1.要面對旁人嘅閒言閒語

其實全職媽媽未做媽媽之前,絕大部分都曾經在職,大家都明白工作嘅重要性,當然知道冇咗份工就會小咗收入嘅道理喇。但係往往身邊嘅人都會以為你唔知,然後測猜全職媽媽肯定係嫁畀富豪,都會問:「你老公揾好多架?你咁好唔洗做嘢嘅?」或者話:「你喺屋企就好喇!唔洗做!」首先,老公揾幾多都好,點解阿媽湊仔就叫唔洗做?但傭人湊小朋友叫返工?

shutterstock_360410669

如果遇上大年紀啲嘅長輩仲會問:「你咁得閒喺屋企湊仔,屋企家務仲做唔好?想當年⋯⋯我一個湊十幾個咪係要買餸!」無可否認,好多長輩都係超人媽媽,但每一個人面對嘅事都唔同,社會環境都會影響一件事嘅難易程度,經驗可以用作參考,但絕對唔可以用自己嘅尺去量度人地架!

上述嘅閒言閒語未必係最難頂,最令全職媽媽失落嘅莫過於係出席朋友聚會,喺討論工作問題時,有人會話:「做湊仔婆點會知出面發生咩事。」全職媽媽屋企唔係山洞,係有電視、電腦同網絡,其實咁嘅說話也未免太自大,難道講依番說話嘅人,你又知全世界每個職業嘅事?

2.病咗無sick leave 點都要頂硬上

shutterstock_1012207225

正常一份職業都有僱傭條例保障,病咗sick leave是常識吧!但係做全職媽媽真係病咗都要頂硬上,返工都可能有好同事好上司幫忙頂住先,但全職媽媽又可以揾邊個頂呢?如果揾到親朋好友幫忙湊下,仔女又未必肯,係咁揾媽媽,難度真係可以咩都唔理養病咩?

shutterstock_523739068

3.要問老公拎家用

如果要計一個全職媽媽嘅人工,應該可以列入世界打工皇帝排行榜。一個媽媽身兼多職:管家、老師、廚師、清潔員、心理學醫生、服裝及室內設計師、司機、心理學醫生、會計師等工作,如果每項職務都有人工,年薪應該有⋯⋯但可惜,現實就係仲要問老公拎家用,想用多少少買自己鐘意嘅野都唔禁,平日自己慳返嘅支出,仲要被屋企人話打斧頭。遇上錫自己嘅老公肯做提款機,但自己都唔夠膽拎,覺得要留返界仔女用。

4.吃力不討好

shutterstock_1005901192

全職媽媽升職加薪唔洗諗,升職做人婆婆,可能仲有更多嘢憂心。有時做全職媽媽,就好似「老鳳」,屋企每一項工作都好似係全職媽媽「應份」要做,畀心機做得好嘅嘢可能都得自己識欣賞,唔洗旨意有人讚。有時仲要被仔女激,仔女又未必明你諗咩。做全職媽媽同返工唔同,你可以同上司或者同事表達自己意見,大家雙方諗方法解決,但全職媽媽就只有自己解決問題,EQ低少少都唔得,但想唔好咁負面,可能都要自己主動樂觀啲,係一份吃力不討好職業。

正所謂「你睇我好,我睇你好」,全職媽媽嘅苦唔通每日同你講咩?全職媽媽仲要湊仔煮飯架!希望大家可以尊重、體諒同關心下全職媽媽喇!

Text:Mami Editorial

Photos:Shutterstock

Follow Instagram: mami.presslogic


Share to Facebook