邊個星座嘅BB最貼心/最難湊?BB星座TOP 3排行榜

邊個星座嘅BB最貼心/最難湊?BB星座TOP 3排行榜

靚媽鬆一鬆
By PressLogic on 18 Dec 2018

BB係咩星座?星座真係會影響BB嘅性格嗎?相信十二星座嘅爸爸媽媽或多或少都會參考下星座嘅特質,去估計BB嘅性格,不過準唔準就見仁見智。事實上,有啲BB天生就活潑好動,常常令爸爸媽媽感到好嬲又好笑;有啲BB天生就文靜怕醜,令爸爸媽媽樂得空閒。究竟呢啲性格特質都同12星座有冇關?不妨參考下呢個最貼心&最難湊嘅BB星座TOP 3 排行榜。

shutterstock_450691186

首先係最貼心嘅首3位星座:

第一位:巨蟹座 (6月22日-7月23日)

巨蟹座出晒名係溫馴,黐屋企嘅程度更係無其他星座可比擬!而且巨蟹BB又特別鍾意撒嬌,常常會主動對爸媽講出超貼心嘅說話,如:「我愛你」、「我要永遠同你哋一齊!」令爸爸媽媽個心sweet到漏!加上會主動幫忙做家務,係爸爸媽媽眼中嘅超貼心乖巧好寶寶!
不過,雖然巨蟹BB睇落冇咩脾氣,其實佢哋唔係真係唔會嬲,只係將唔開心都忍落嚟,所以爸爸媽媽都要適時注意BB嘅情緒!

第二位:雙魚座 (2月19日-3月20日)

雙魚座個性親切溫和、天真爛漫、善解人意,係一個愛笑嘅小寶寶,不過雙魚BB好易會缺乏安全感,所以天生就會特別依賴爸爸媽媽,總係會黐到爸爸媽媽實一實,有時會令爸爸媽媽覺得係一個難纏嘅小傢伙,不過爸媽千祈唔好對佢哋講笑話要將佢哋送畀人或唔要佢嘅說話喔!會對雙魚BB造成好大嘅心理陰影。
雙魚BB好鍾意親近人,耳仔亦好軟,所以爸爸媽媽要注意雙魚BB長大後交朋友,「近朱者赤、近墨者黑」呢!

第三位:天秤座 (9月24日-10月23日)

天秤座性情溫和、優雅得體,係一個熱心嘅小寶寶,所以無論人緣定係長輩緣都非常好,十分討喜!而且天秤BB EQ通常都好高,好少會有太大嘅情緒起伏,所以非常好湊!不過雖然天秤BB表面睇落平和,但當受到責備嘅時候,都會覺得好受傷,但只係默默收埋喺心底,爸爸媽媽要小心天秤BB嘅負面情緒愈積愈高而大爆發啊!

天秤BB比較欠缺主見,有選擇困難,好多時都需要爸爸媽媽代為做決定,爸爸媽媽可以慢慢引導佢,千祈唔好流露出唔耐煩嘅口吻。

shutterstock_611432465

跟住就到最難湊嘅首3位星座:

NO1. 天蠍座 (10月24日-11月22日)

天蠍座外表睇落安靜乖巧,但實際上內心好火爆,常常會上演好多內心小劇場,情緒話嚟就嚟,有時會令爸爸媽媽覺得好難捉摸。不過,天蠍BB都係好感性,對於爸爸媽媽嘅養育之恩都會牢牢記喺心,間中都會出現貼心嘅小舉動。天蠍BB嘅喜惡分明,對於討厭嘅人或事物,點都唔會變成鍾意,而且非常記仇,只要曾經得罪佢,絕唔會畀好面色你睇,不過其實天蠍BB受軟唔受硬,只要順著個性去教,其實天蠍BB都可以好好養!

NO2. 雙子座 (5月22日-6月21日)

雙子座活潑開朗、思路敏捷,所以非常好動,總係會忙過不停,呢樣玩下、嗰樣玩下,表現得冇咩耐性,喺長輩眼中,就係一個頑皮嘅小寶貝,所以要照顧好雙子BB,爸爸媽媽都要付出相當多嘅精力先可以應付!而同雙子BB溝通都要非常有恆性同毅力,因為佢哋總係左耳入、右耳出,就算一再提示佢哋都未必真係有聽入耳。

NO3. 摩羯座 (12月22日-1月19日)

摩羯座非常有個性同固執,凡事都要按照自己嘅規則走,有時仲非常鍾意唱反調,同父母對抗,例如愈唔準佢做嘅嘢就偏要做,令爸媽非常頭痛!不過摩羯座並唔係一個刻意要做一個壞孩子,只係需要更多關心,亦比較愛面子,其實只要唔係太過份嘅話,爸爸媽媽有時都可以順魔羯BB嘅意,等佢自己學識分寸,換來家庭嘅和平。

不過星座都唔能夠完全反映一個人嘅個性,所以爸爸媽媽都係志在參考一下,唔駛太認真或在意,無論咩星座嘅BB都總會有乖巧同百厭嘅一面,始終都係爸爸媽媽嘅心頭肉啊!

Text: Mami Editorial

Follow Instagram: mami.presslogic


Share to Facebook