【原來坐月唔係想像中咁簡單】

【原來坐月唔係想像中咁簡單】

Bloggers 專欄
By j_and_mama on 04 Jan 2019

及及係第一胎,冇陪月嘅我,根本就唔知坐月係咩一回事…除咗唔好吹風/唔好食生冷嘢之外,原來仲有好多嘢要注意!幸好家人同身邊朋友都有提醒我~

1. 唔好用生水洗手/沖涼,要用煲過嘅薑水

之前一直以為坐月沖涼先要用薑水,但原來洗手都唔可以用生冷水,因為生完BB皮膚毛孔擴張,生冷水比較寒涼,怕風寒入咗身體,所以最好就用薑水熟水。就算同BB沖涼要用生水,沖完都要用布完全抹乾手指,唔好入風,如果唔係好易有風濕。好彩坐月時有婆婆幫及及沖涼
heart

2. 唔好拎重嘢

生完BB子宮同傷口都要時間慢慢復原,拎重嘢會容易令到子宮下垂,又可能會拉扯到傷口,所以都係乖乖地請屋企人幫手。之前老公跌斷腳,我坐完月冇耐推著輪椅同佢覆診,醫院姐姐見到知我生完BB都特登走嚟叫我唔好推,話會令到子宮下垂,我諗應該都係同樣道理~

3. 唔好喊/太用神

婆婆話坐月唔好喊,如果唔係會眼朦,我以為係講下,但上網睇原來真係有根據,中醫話喊會傷肝腎,加上生完BB已經氣虛血弱,所以最好就唔好喊/太用神。我都明白產後難免會受荷爾蒙變化影響情緒,不過都盡量控制下啦~ 我坐月時都有喊過,唔知關唔關事,宜家對眼成日都有D朦…

4. 盡量唔好企得耐/踎低

可以訓低就訓,唔可以訓低就坐低,生完BB子宮同傷口未復原,盆底肌鬆弛,企得多/踎低容易令子宮下垂。之前及及未滿月就入咗醫院,對面床BB個嫲嫲見我成日行黎行去,都好好心咁提我坐月唔好企咁多,如果唔係子宮會下垂,果時我先知原來企都唔係咁好…同埋可能我坐月時好少訓低,宜家經常腰骨痛

5. 唔好企係度飲水

唔知有冇根據,但有長輩話坐月唔好企係度飲水,好似話怕老咗會失禁,不過係真定假都好,坐月都盡量坐下,慢慢黎唔好急

最後,最緊要嘅就係唔好太大壓力,保持心境開朗,媽媽們加油喔!!

仲有D咩要留意?大家不妨分享下 :)

==============================

Text & Photosj_and_mama

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: mami@presslogic.com,我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: mami.presslogic


Share to Facebook