【開始了解媽媽想法 不顧身保護仔女】

【開始了解媽媽想法 不顧身保護仔女】

Bloggers 專欄
By 薯蛋媽媽 on 05 Jan 2019

未做人媽媽之前,我一直覺得「人是獨立個體,仔女是另一部分,自己嘅價值、將來希望應由自己建立,不能靠仔女」

但原來不知不覺,自己嘅價值、成功感同人生希望都要從仔仔身上先揾返。

前排,經歷一段令我身心交瘁嘅事(其實我好中意依嗰平台,大家媽媽會互相支持,分享自己故事,我都不知不覺有心事都想同大家講,因為我都唔知同咩人講好了⋯)依件令我好攰嘅事,就係薯蛋嫲嫲竟然揾上門(佢去我做嘢嘅地方)要見薯蛋,話個孫佢都有份,話薯蛋有權見佢個仔,同有完整嘅家,叫我唔好剝奪薯蛋權利。

我個刻真係好想一巴一巴煎落佢到,問清楚佢,當初邊個企圖剝奪薯蛋生存權利?

但個刻我嬲到一句說話都講唔出,只係心諗我要保護我個仔,你唔好搞到佢!

之後,我返到屋企我都冇講件事畀薯蛋婆婆聽,因為依件事令我諗起自己童年,我係到諗究竟自己應唔應該咁做?

shutterstock_153040181

我唔係好似薯蛋咁一出世無爸爸,我老豆係我中學離開我,記憶中喺童年我老豆好錫我,就算我點曳、駁嘴佢都只係笑,就算我隻親腳指佢都會緊張到喊,但有時我都會見到媽咪畀爸爸鬧,鬧到喊,唔知邊年邊月邊日,佢就連我喊住叫佢唔好打媽媽佢都無動於衷,我當時好嬲點解媽咪唔同爸爸離婚,我覺得成段關係好痛苦,見到媽媽都好痛苦,但我好記得我媽媽講左一句「我唔憎你老豆,我對佢已無感覺,但我心痛你為我哋而傷心,我失去老公唔緊要,我仲有你,已經夠」我當時完全唔明白,好唔服氣,但因尊重媽媽我無再理會。

shutterstock_389849503

到今時今日,我見到薯蛋,我終於明白,婚姻上我已經失敗,我被我愛嘅人出賣、背叛同欺騙,但突然上天派咗另一個人黎,佢依靠我,我好似重新得到希望,有新開始,所以奮不顧身建立依個生命,只要佢快樂就得,因為佢係我嘅新生命。依刻真係好想同媽媽講:「媽咪對唔住,我咁遲先學識諒解你」。

我唔想有一個有可能會傷害到依嗰「新生命」嘅人出現,同時我都唔想理會其他人,因為只要佢幸福快樂就夠,當然我要有心理準備薯蛋會大個會有思考,佢可能會想見依個有份提供生命體畀佢嘅人,但一切到時再算⋯喺薯蛋未識自我保護前,都由我去做,有0.000000001%會令到薯蛋不安嘅人同事我都唔會畀佢發生,尤其一啲人為事情!

==============================

Text : 薯蛋媽媽

PhotosShutterstock

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: mami@presslogic.com,我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

Follow Instagram: mami.presslogic


Share to Facebook