親友想抱BB但BB驚到大喊  4個方法減輕BB陌生焦慮

親友想抱BB但BB驚到大喊 4個方法減輕BB陌生焦慮

親子相處
By PressLogic on 11 Jan 2019

相信父母都會遇過,當親朋好友專程嚟探訪BB,BB都會眼仔碌碌望住初次見面嘅人,但當要被親友抱起嘅一刻,BB就會大喊不止,令場面相當尷尬。BB「怕生保」最常出現喺半歲以後,全因呢個階段嘅BB已經識得辨認熟悉同陌生嘅面孔,對著熟悉嘅人會感到安全感,相反面對陌生人,就會因唔確定安全性而感到焦慮。想減低BB嘅焦慮情緒,爸爸媽媽可以嘗試以下4個方法:

shutterstock_115796929

1. 家長抱著BB坐

面對初次見面嘅親友,BB好多時會感到不安同害怕,呢個時候爸爸媽媽可以先抱著BB坐,令BB感受到有熟悉嘅人喺自己身邊保護自己,令安全感提升,然後爸爸媽媽再同親友閒談,呢個時候BB會觀察著陌生人嘅一舉一動,判斷呢個人有冇危險性。

2. 請親友慢慢同BB互動

當親友見到BB嗰陣,通常會表現得好熱情咁包圍著BB,甚至想伸手親近BB,但忽然成為陌生人焦點所在嘅BB會感到好驚慌而哭喊。所以爸爸媽媽應喺親友入屋嘅一刻,先邀請佢哋坐低閒談/飲茶,等BB慢慢習慣眼前嘅陌生人,再請親友同BB互動一下,循序漸進嘅接觸可以減低BB對眼前人嘅緊張情緒。

shutterstock_1204875721

3. 父母喺BB面前同親友接觸

BB知道熟悉嘅人唔會傷害自己,但唔清楚陌生人嘅一切,所以初次見面會感到有威脅性。爸爸媽媽可以喺BB面前先作示範,同親友握手擁抱等,令BB知道同親友接觸係唔會受到傷害。而親友可以同BB肢體接觸前先同BB玩遊戲,令BB感到同眼前人相處係開心,然後會安心接受親友嘅觸碰。

shutterstock_301478432

4. 見到BB喊唔好過份緊張

其實好多時BB嘅焦慮情緒都好受父母嘅態度影響,如果BB喊嘅時候,爸爸媽媽嘅反應好大嘅話,會令到BB更加緊張,而喊得更厲害。爸爸媽媽亦唔好因為BB怕生保而減少帶BB出街,反而應該多啲畀BB接觸新面孔,令佢哋更習慣面對陌生人,減少不安感。

不過家長都要留意,如果BB真係好抗拒陌生人嘅接觸,千祈唔好勉強BB去用親友接觸,否則只會令BB更害怕見到陌生人,最後弄巧反拙!

Text:Mami Editorial

Follow Instagram: mami.presslogic


Share to Facebook